Вöльдiнса том артист

Тöдмасьöй, кодi абу на тöдса – Илья Карманов. Тайö Кулöмдiнса визув зонкаыс зэв на том, а уджалö-артисталö нин карса театрын. Колян во сiйö помалiс Сыктывкарса В.Т. Чисталёв нима культура колледж, велöдчигас на заводитiс ворсны Коми Республикаса вужвойтырлöн шылада-драмаа театрын. А öнi на сöмын Илья локтiс армияысь да бöр пырöдчö уджö, öд сiйöс виччысьöны сылöн рольясыс.

Зон ворсö шмонитана роль «Льӧм пу дорын аддзысьлӧмъяс» тешын – порсь видзысь Карпöс, кодi радейтö кукань видзысь Соловейöс (Шура Соловьёваöс), томиникöсь да асныраöсь, найö некыдз оз вермыны лöсявны – нывка пыр зонмöс дэльöдö, а зон ставсö примитö зэв матö сьöлöмас.  «Кабаре «Сыктывса кань» мича спектакльын, кöнi авторыс Сергей Журавлёв петкöдлö, кыдзи 1812 во бöрын Усть-Сысольскын овлiсны французъяс, Илья ворсö коми зонмöс, сьылысь-йöктысьöс. «Йöкты, муслун» (Лопе де Вегалöн «Учитель танцев») комедияын И. Карманов – испанияса йöктысь.

Öнiя кад кежлö медыджыд рольяс Ильялы вичмисны Владимир Тимин серти пуктöм кык спектакльын: «Эжва Перымса зонка» да «Ыджыд Перым да Мӧскуа» этно-мюзиклъясын. Медводдза юкöнас, кодi шусьö кыдз и повесьтыс, Илья ворсö Ирьянкоöс – шöр геройлысь ёртсö. «Ыджыд Перым да Мöскуа» юкöнас том артист ворсö Чердiнса мужичöй Бисярöс да Мöскуаса пирöг вузалысь Провöс.

«Эжва Перымса зонкаын» действиеыс мунö Емдiнын 15 нэмын. Тикö (ворсöны Александр Канев либö Валериан Канев) да Ирьянко (Илья Карманов) мунöны ылi вöр керка дорö кыйны чери, а збыльвылас кö, налы окота тöдмавны, мыйсяма гöгöрвотöмтор керсьö сiйö вöръясас. И збыль, найö тöдмалöны, мый вöрöгъяс-йöграяс гусьöн локтöны, мед уськöдчыны Емдiн вылö. Йöграяс öдва оз вины том йöзöс асьнысö, а öд накöд мöдöдчис и Тикöлöн ичöтджык чойыс Кыйва (ворсö Анна Попова)... Тайö спектакляс том йöз пырыс да и став емдiнса олысьяс пырыс петкöдчö миян вöр-ва дiнö пыдi муслун, топыда сыкöд йитчöм, сылысь законъяссö тöдöм. 15 нэмын вöр-ваыс збыль вöлi коми йöзлы оланiнöн, и кöть эськö Перымса Степан неважöн на комиясöс пыртiс Кристос эскöмö, выль эскöмыс эз торкав вöр-ва вынъясö эскöмсö.

Колö шуны, мый тавося ноябрö «Эжва Перымса зонка» повесть серти мюзикл-дилогияыс лоис лауреатöн «Лучшие товары и услуги Республики Коми» конкурсын. И зэв регыд тайö мича спектакльсö театр вайö Кулöмдiнö – «Эжва Перымса зонка» позяс аддзыны декабрь 19 лунö районса культура керка сцена вылын.

Театрö волiсны гöстьяс

Ноябрь 21 лунö миян театрын вöлi уна гöсьт.

Öти-кö, Светлана Гениевна дорö волiсны комиöн гижны заводитысьяс. Коми гижысьяслы семинар нуöдiс Гижысь котыр, и öти лун вöлi сиöма драматургиялы. Артмис сiдз, мый тайö лунö театрö чукöртчисны унджыкыс мужичöйулов. Сёрниыс мунiс драматургия гижан теория йылысь, гижöдъясысь примеръяс босьтöмöн. Прöстджыка кö – кыдзи колö и кыдзи оз ков гижны пьеса. Медшöр мöвпъяссö вайöдам и танi.

Драматурглöн медшöр материалыс – конфликт. Режиссёр сэсся сы вылын подуласьöмöм петкöдлö венласьöм, а артист тайö венласян действиесö вöчö. Гижны заводитiгöн колö юавны ассьыд – мый тэнö вöрзьöдö олöмас? Мый оз кажитчы? И петкöдлыны сiйöс сiдз, мед видзöдысь лоис тэкöд сöглас либö эз, но мед сiйöс тшöтш вöрзьöдiс. Тшöкыда лыддям, кыдз пьесаясын гижöны сёрнисö кыдз медшöртор, а колö, мед медшöрнас вöлi лоöмтор. Öд конфликтыс петкöдчö действие пырыс.

Драматургия - тайö олöмыслöн квинтэссенция, автор петкöдлö дженьыд кадöн унатор. Овлö, мый гижöны сiдз, кыдз эм – кузь сёрниясöн, ньöжмыда, но видзöдысьлы места вылын жöдзöмыс öдйö дышöдас. Сылы окота тöдны, а мый водзö? Мый лоис та бöрын? Олöмным öнi миян зэв жö öда, тэрыб. И колö сюжетыслы öдйö бергöдчыны, вежсьыны. А сюжетыс, кыдзи и геройясыс, пыр уджалö медшöр конфликт вылö. Быд лоöмторйын, вöчöмторйын эм помка да сыысь артмöмтор. И найö чеп моз кыöны сюжетсö. Тайö «причина-следствие» йитöд.

Театрö волысь сы вылö и шусьö «видзöдысь», мед аддзыны лоöмторсö сцена вылысь. Не кывны медводз, не мöвпавны дыр, мый жö кöсйис шуны авторыс, а аддзыны. Уна тема вылö оз позь шыбласьны, колö нуöдны медшöр визь, а мöдног видзöдысь оз и кут гöгöрвоны, мый йылысь сiйöс корö мöвпыштны авторыс.

Медводдза серпассянь видзöдысь должен аддзыны кутшöмкö лоöмтор, мыйсянь ставыс заводитчö. Геройлöн эм кöть кутшöмкö, но кризис, мыйкö вежис сылысь олöмсö. Пьеса чöжöн оз позь вежны геройлысь сямсö, сiйöс кö оз веж кутшöмкö вына лоöмтор. Вежсьö кö видзöдласыс - сiдзкö, та йылысь и пьесаыс.

Гижöм водзын драматург должен гöгöрвоны, кутшöм конфликт сiйö петкöдлас: герой – герой, герой – среда, герой – видзöдысь. Бытовöй тайö конфликтыс али социальнöй.

Но медбура пьесаыс артмас сэки, кор авторсö темаыс збыльысь майшöдлö.

Мöд-кö, тайö жö лунö театрö волiс Францияса коми культура туялысь Себастьян Каньоли. Став артистъяс, мукöд уджалысьяс радпырысь кывзiсны гöсьтöс. Комиöн, дерт. Сёрнитiм выль петöм небöг йылысь, кодöс Себастьян и воис презентуйтны Комиö. Небöгыс шусьö, коми ног кö, «Коми му весьтысь занавес кыпöдöм. Россия Войвывса фин-угор театр став миркöд сёрниын». Танi сiйö унатор гижöма и миян театр йылысь, некымын пьеса йылысь, кодöс аддзылöма да лыддьылöма, Ниццаса театркöд миян ёртасьöм йылысь. Себастьян, кодi оз тöд, ачыс вуджöдö коми пьесаяс француз кыв вылö, и сы отсöгöн коми пьесаяс ворсöны Францияын.

Виктор Савинлöн Югыд кодзув

Ноябрь 9 – 10 лунъясö Коми Республикаса вужвойтырлöн шылада-драмаа театрын шыалiс премьера. «Югыд кодзув» нима спектакль сиöма Нёбдiнса Витторлöн чужöмсянь 130 во тырöмлы. Тайö пьесасö лöсьöдлiсны Светлана Горчакова да Виктор Кушманов нималана драматург, гижысь, поэт, журналистлöн биография да гижöдъяс серти 30 во сайын на, и сэки сiйö мунлiс драма театрса сцена вылын. Öткымын видзöдысь пасйис, мый кöть найö и аддзылiсны и помнитöны тайö пуктассö, öнiя постановкаыс - дзик выль. Мукöд образыс петкöдлöма дзик мöд ног (шуам, Саваоп да Апостол), торъя ошкöм вичмис оформлениелы да сьыланкывъяслы.

Колö шуны, видзöдысьяс сибöдiсны сценавыв петкöдчöмсö матö сьöлöмас - кодсюрö и бöрдыштiс, да и сералiсны мукöдлаас кыпыда. Чайта, некод эз мун спектаклысь тыртöм мöвпöн, быдöн мыйкö аслыс босьтic. Унаöн вуджöдiсны пöшти сё во сайсясö öнiя кад вылö, и таысь нюкыртлö сьöлöмтö... 

Спектакляс сюрис места и тешлы, и шоглы, видзöдысьлы петкöдчис Виктор Савинлöн Райыс – сылöн творчествоыс, да Адыс – буретш тайö творчество вöснаыс сiйöс мыжтöг мыждöм. Öти сцена вылö петiсны и ачыс Нёбдiнса Витторыс (ворсö Александр Ветошкин), и, дерт, сылöн геройясыс, на пиын и Сюзь Матвей (ворсö Сергей Туркин).

Спектакль дорö шыладсö гижис Коми Республикаса народнöй артист Александр Ветошкин.

Виктор Савин – морт, кодлöн нимыс топыда йитчöма коми культуракöд. Веськыда кö, сiйö ачыс и лöсьöдiс-сöвмöдiс коми культуранымöс, и сетiс олöмсö вужвойтырлöн искусство понда – веськалiс НКВД-са изкиö кыдз националист. Уна эськö сiйö вермис на гижны, эз кö сiйöс ви сэкся чорыд кадыс. В. Савин гижис 30 сайö пьеса, но унджыксö на пиысь ми эгö аддзылöй да огö нин вермöй лыддьыны – ниöти лист эз коль, кöть эськö сы кадö тайö гижöдъяссö чайтлiсны коми литература шедеврöн.

Уна гижöд сылöн сиöма Октябрьса революциялы. Но шöр визьыс век жö вöлi Коми му, кыв да йöз дорö муслун. Савинлöн гижöмыс петкöдлö буретш коми сёрниног, оласног, фольклор – сiйö зiлис, мед гижöдъясас тöдчис национальнöй сям.

А уджалiс творчествоас сiйö шензьöдана зiля – гижис пьесаяс, вöчис инсценировкаяс, ачыс пуктiс народнöй театрын пьесаяссö, ворсiс рольяс, а нöшта и уджалiс – ЧК-ын, газет редакцияын...

«Югыд кодзув» - тайö абу сöмын тöдса сьыланкывйыс, кодöс гижис В. Савин. Тайö сылöн енбилöн кодзув, кодысь ми, водзö олысь комияс, дыр на сiйöс  кутам аттьöавны.

Кодi эз удит видзöдлыны премьерасö, корам спектакль вылö ноябрь 21 лунö 16:00 (!) часын.

Коми мойда шойччан лун

 Кодi, огö кö ми асьным - бать-мамъяс, пöль-пöчьяс - видзöй-сöвмöдöй ассьыным коми кывнымöс. Мед кывным олiс, колö, мед челядь тöдiсны, сёрнитiсны, лыддьысисны комиöн.

А ми öд асьным вöчам, кыдз кокниджык: челядь рочасьöны – и накöд рочасям ми, бать-мам. А öд видзöдлан во дас мысти – и некодлы нин лоас лыддьыны Геннадий Юшковлысь сöстöм коми кывъя романъяс, Серафим Поповлысь муслун чужтысь лирика… Роч вылö вуджöдöмыд, кыдз эськö эз вöв мичаа вöчöма-шыльöдöма – оз öд петкöдлы коми кывлысь серпасалунсö, татшöм образъяса, вуджöдтöм сёрнилысь мичлунсö сöмын чужан кыв вылад и гöгöрвоан.

Коми кыв видзöм йылысь мöвпалö и коми театр. Коми кывъя видзöдысьлы колö коми театрыс. Мед кывзыны чужан кыв вылын ворсöм-сьылöм да шойччыны лолöн. А коми театрлы колö коми видзöдысь, сытöг öд и став коланлуныс кусас.

Ми, коми йöз да комиöн ворсысьяс-сьылысьяс, зэв ёна кöсъям кывны ловъя коми сёрни, мед век вöлi кодкöд сёрнитны комиöн, мед олiс коми кывйыс сцена вылын, мед быдмисны-сöвмисны коми гижысьяс, драматургъяс, мед лоисны выль коми гижöдъяс, пьесаяс, сьыланкывъяс. И зiлям та понда унатор вöчны. Петкöдлам спектакльяс коми кыв вылын, нимöдам коми гижысьясöс, сьылам комиöн, ворсам комиöн, сёрнитам комиöн, и зэв ёна надейтчам, мый бурмöдам сьöлöм коми кыв радейтысьяслы.

Вужвойтырлöн шылада-драмаа театр öнi петкöдлö шойччан лунъясö челядьлы мойдъяс, кытчö позьö волыны став семьяöн. Миянлы окота, мед буретш öтлаöн, котырöн, коми йöз видзöдiсны-кывзiсны чужан кывъя спектакльяс, мича яръюгыд мойдъяс. Челядьлы, кодi озджык гöгöрво комисö, вермас отсавны вуджöдчан аппаратура. Мукöд посниыс сы вöсна и радейтö ветлыны коми театрас. А кодi неуна сёрнитыштö-гöгöрвоö, налы вермасны отсавны-вуджöдчыны и бать-мамыс. И став семьялы гаж да öтув шойччöм, и коми кывным водзö вылö оз вун. Вайöдлöй челядьнытö коми спектакльяс вылö!

Октябрь 28-öд лун (вöскресенньö) 11:00

– «Нагай лэбач» мойд, Н. Щукин, 0+

Ноябрь 25-öд лун (вöскресенньö) 11:00

– «Ёма да Чача» мойд, А. Епанешников, 0+

27 сезон восьтöм

Коми Республикаса вужвойтырлöн шылада-драмаа театр восьтiс 27-öд сезон.

Сентябрь 28 лунö театральнöй сезон воссис концертöн, кодöс шуöма «Ми - комиöн сьылысь колипъяс». Концертын петкöдчисны пöшти став артистыс, дерт жö, сьылiсны «Парма» ансамбльса солистъяс. Том артистъяс, кодъяс сезон уджалiсны нин театрын, тшöтш петкöдлiсны ассьыныс кужанлунъяссö. Шуам, аньяслы удитiс нин воны сьöлöм вылас том зонъясöн артмöдöм сьылан котыр. Öнi найö сьылiсны "Мича Райда" да комиöдöм "Королева красоты", мыйöн шедöдiсны "браво!" ошкöмъяс да гораа клопайтöм. Кык да джын часся концертыс, чайта, эз мудзтöд видзöдысьясöс, öд найö, тыдалö, ёна нин гажтöмтчöмаöсь миян артистъясысь!

"Парма" котыр медводз петкöдлiс асьсö сэтшöмöн, кутшöмöн сiйöс котыртiсны 30 во сайын - коми фольклор сьылысь-ворсьысь котырöн. Видзöдысьяс эз сöмын нимкодясьны важся коми сьыланкывъясöн, но и пöттöдз сералiсны шмонитана петкöдчöмъяс вылын. 
Нöшта на видзöдысьясöс чуймöдiс Александр Ветошкин - сiйö ворсiс "Вечная любовь" францияса шылад... пила отсöгöн! Концерт нуöдысь Андрей Епанешников содтыштiс ассяньыс: "Ветошкинлöн весиг пилаыс сьылö!"

Концертын медводдзаысь петiс сцена вылö нöшта öти Щукин нима театральнöй институт помалысь – Роман Поличенко. Армияö ветлöм бöрын сiйö пырöдчö артист уджö. 

Содта, нöшта öти коми зон, Антон Куратов, пырис велöдчыны тайö институтас таво. Регыд мысти кутам сiйöс виччысьны коми театрын кужысь артистöн нин.
Концертын, йöзкостса сьыланкывъясысь öтдор, вöлi уна вояс сайын гижöм, тöдса, но выльмöдöм сьыланкывъяс: "Бур батькöд-мамкöд олöм", "Пукала кöть ветлöдла", "Воши гортö мунан туйыс", комиöдöм роч сьыланкывъяс, öнiя кадся коми авторъяслöн сьыланкывъяс.

Сентябрь-октябрь вылö репертуарын – театрлöн бöръя воясся медбур спектакльяс. На лыдын «Ставсьыс мыжаыс Париж», «Кабаре «Сыктывса кань», «Гöтрась, пиö, гöтрась», «Льöм пу дорын аддзысьлöмъяс», шылада пуктасъяс «Парма лов» да «Биармия». Выльпöв тыдовтчас сцена вылын мирса классика «Йöкты, муслун!» (Лопе де Вегалöн «Учитель танцев»). 

Октябрь 28 лунö, шойччан лунö, театр корö волыны став семьяöн "Нагай лэбач" мойд вылö. Мойдыс лоас 11 чассянь.

Шылада-драмаа театр помалiс 26-öд театральнöй сезон

Сезонын театр петкöдлiс вит выль спектакль. Жанръяс серти найö ёна торъялiсны: мюзикл, драма, теш, мойд, мелодрама. Тайö сезоныс воссис нимкодь юöрöн: медводдзаысь 25 воöн театрö воис велöдчöм бöрын дзонь котыр, сизим том йöз велöдчисны артистö буретш мед локны бöр уджавны коми театрö. Таöдз театрын уджалысь артистъяс велöдчылiсны Ярославльса театральнöй институтын, театрас уджалiгас нин.

Сезон заводитчигöн видзöдысьяс вермисны донъявны выль артистъяслысь уджсö: öтвылысь нималана нин артистъяскöд Щукин нима институт помалысьяс пуктiсны «Биармия» арт-рок мюзикл. Режиссёрнас вöлi Москваса институтса велöдысь Дмитрий Волков. Каллистрат Жаковлöн эпос серти пуктöм мюзиклыс лоис аслыспöлöс: ёсь, гора, мукöд пöрйö зумыш, весьöпöртана, ыджыд энергетикаа. Режиссёрлöн, а сiйö жö и композиторыс, видзöдлас серти миян важ пöльяс вöлiсны вынаöсь, а выныс налы колiс, мед водзö овны да нуöдны кöленасö. Вит во сайын коми театр пуктылiс нин «Биармия» вылö мыджсьöм «Парма лов» шылада спектакль, режиссёрнас вöлi Светлана Горчакова, шыладсö гижис Михаил Бурдин. И позьö шуны, мый «Биармия» мюзиклкöд сiйö ньöти абу öткодь, а мукöдлаас найö весиг паныд сувтöны – сiдз асног лыддисны Жаковлысь гижöдсö да мöвпыштiсны ассьыныс сценавывса серпассö кык режиссёр.

Водзö лои пуктöма «Ставсьыс мыжаыс Париж» шылада теш. Алексей Поповлöн гижöдторйыс бара на нимкодьмöдiс театр радейтысьясöс. Быттьö и кокни сюжетыс – сиктса морт ветлöма Парижö, а гöтырыс вежöгтö – но кыдзи ворсöны артистъяс! И он пыр вермы гöгöрвоны, збыль-ö Миш Öльö (кодöс ворсö Александр Ветошкин) аслас Валя гöтыр кындзи (ворсö Альбина Карманова) некод вылö эз и видзöдлы? Мыйсяма гуся козин да кодлы вайис Парижысь Миш Öльöыс? А гашкö, сылöн эм мыйкö гусятор Виолетта библиотекаркöд? (ворсö Анна Попова). Мичмöдöны тешсö и сьыланкывъяс, шыладсö на дорö гижис Марк Новосёлов. Гажа руа, кокни да серамбана артмис спектакльыс.

Ноябрын театр лэдзис драма, режиссёралiс Марий Элысь воöм Василий Пектеев. Елена Козловалöн тайö медводдза пьеса. Коми гижысь котырöн веськöдлысьöс ми тöдам кыдз челядьлы гижысьöс, а танi выль жанр, выль гижан сям – «Туй дор бадь» пьесаыс пыдi психологияа, мортлöн нелючкилунсö эрдöдысь, пытшкöсса майшасьöмъяссö петкöдлысь пьеса. Медшöр да медсьöкыд рольсö ворсiс Андрей Епанешников. Сылы колö вöлi гöгöрвоны геройсö, сыöн веськöдлысь сьöлöмкылöмъяссö. Мыйла буретш öнi, уна во мысти, Авенирыс явитiс важся кольöмторсö, мыжсö, кодi сьöктöдiс сылысь олöмсö. Видзöдысь водзын сувтö юалöм: быд-ö морт, кодi ортсы серти бур, збыльвылас сöстöм? Миян водзын öтарö петкöдчöны контрастъяс: öнiя кад да важ, гажöдчысь том йöз да шогсьысь герой, озыр олöм да прöст йöз. Сюжетыс спектакльыслöн бергöдöма сiдз, мый видзöдысь тöдмалö ставсö сьöрсьöн-бöрсьöн, оз пыр, и интригаыс кутчысьö помöдзыс.

Выль во кежлö том артист, режиссёр вылö öнi велöдчысь Семён Горчаков пуктiс ассьыс медводдза спектакль - «Кöдзыд пöль да Сьöд принц» мойд. Челядьлы зэв ёна воисны сьöлöм выланыс чуймöдана декорацияяс да костюмъяс, öд мойдас сёрниыс мунö космосса ылi олысьяс йылысь, а танi вежöрыд вермас кöть мый думыштны! Театрса том серпасалысьяс и мöвпыштiсны мича да югыд декорацияяс, биöн öзъялысь костюмъяс. Космосса Сьöд принцлöн «горш челядьöс ньылыштан машинаыс» быттьö и збыль космос пасьта уджалö. А принцлöн сьыланкывйыс, кодöс дзик оз позь сьывны, öд сэки тэнö кыскас тайö машинаас, сiдзи и кöвъясьö ачыс! Семёнлöн медводдза пуктасыс, чайтам, артмис бур.

Март тöлысьын театрын пуктiсны Василий Лекановлысь «Горш тулыс» мелодрама. Спектакльсö лои сиöма авторлöн 100 во тырöмлы. И синваа, и серама пьесаыс кöть и важджык олöм йылысь, но таысь ньöти абу ылыс öнiя мортлы. Быд пöръяö веськöдлö радейтчöм. Кодлöнкö гуся, кодлöнкö шудтöм, но том йöзыдлöн быдöнлöн эм, быдöнлы окота радейтны да лоны радейтанаöн. Медшöр рольяссö ворсiсны выль артистъяс. И колö шуны, налöн артмис, найö старайтчисны сьöлöмсяньыс. Ангелина Шаховалöн героиняö радейтчöмаöсь унаöн: крут характера, ас дон тöдысь, гöтыра Андрей (Родион Филиппов), гöтыра жö, сэтчö-татчö шыбласьысь бухгалтер Горик (Данил Чудов), лабутнöй серпасасьысь Анфим (Тимур Смирнов, Андрей Епанешников). А наöн радейтана Кристинаыс бöрйис лов сертиыс Юрийöс (Валериан Канев), а сiйö вöлöм, дзебö сыысь ассьыс збыль олöмсö. Спектакльыс видзöдсьö кокниа - авторлöн бур юморыс, режиссёрöн содтöм кывбуръясыс мичмöдöны сiйöс.

Тайö сезон кадö театр ветлiс гастрольясöн Албанияö, Ижевскö, Кировö, Воркутаö да республикаса кар-районъясö.

Локтан сезон кежлö шылада-драмаа театр дасьтö нин выль спектакльяс. Арнас нин ми аддзам сиктса теш, драмаа поэма да зэв тöдса роч гижöд серти мюзикл. 

Корсям енбиа том йöзöс!

Коми театр Ижкарын

Миян котыр сöмын на воис Ижкарысь. «Ыджыд гастрольяс» федеральнöй грант лои босьтöма да пöртöма олöмö. Кöть эськö сьöмсö сетiсны сöмын туй вылö.

Ижкарса (Ижевскса) видзöдысьяс нимкодьöдiсны миянöс. Öти-кö, залтырöн волiсны, мöд-кö, примитiсны бура. Удмуртияса вужвойтырлöн театрлы тшöтш жö аттьö – и накöд водзö аддзысьлам на, Сыктывкарын.

«Гöтрась, пиö, гöтрась» петкöдлiгöн видзöдысьяс ёна сералiсны. Бур отзывъяс сэсся гижисны:

«Браво-браво-браво! Сиам водзö творческöй вермöмъяс! Туж бадзым тау!» (удм. зэв ыджыд аттьö)

«Шань шмонитöм, кокни гаж, серам. И зэв бура сьылiсны. Таысь торъя нин аттьö.»

«Важöн татшöма эг серав. Аттьö коми театрса ворсысьяслы.»

Ульфат Бадредтинов, «Кизили» журналса шöр редактор гижис: «Национальнöй театрса зал вöлi тыр. Видзöдысьяс зэв бура примитiсны спектакльсö. Дыр, сулалöмöн аттьöалiсны артистъясöс. Молодечьяс! Кокни юмор, артистъяслöн лöсьыд ворсöм – ставыс тайö кыпöдiс лов. Нöшта öтчыдысь аттьö! Спектакльыс эз весьшöрö босьтлы Гран-при». (2013 воын «Гöтрась, пиö, гöтрась» лоис вермысьöн Габровоса теш фестивальын).

«Нöшта öти вунлытöм паныдасьöм - "Жизнь с привилегиями "навечно" спектакль. Зэв вына. Збыльвывса олöм кодь, быттьö ачыд веськалiн сiйö сьöкыд кадас, сiйö зумыш инас.  Майшасьöм, дой, полöм… И радлун, мый орччöн эмöсь йöз, кодъяс дасьöсь отсавны, юксьыны сiйö этшаторнас, мый налöн колис. А нöшта радейтöм. Олöмыс мунö водзö, кöть мый эз ло, кутшöм сьöкыдлун да абутöмлун, торйöдчöм да мытшöдъяс. Регыд Вермöм лун. И тайö спектакльыс нöшта öтчыдысь миянлы казьтылö, мый мирыс дона миянлы и гора кывъястöг, и горзысь лозунгъястöг, мый колö видзны паметьсö на йылысь, кодъяс видзисны морт нога олöмсö шогмытöм условиеясын. Ыджыд аттьö ставлы, кодъяс вöчисны тайö спектакльсö: ворсысьяслы, гижысьлы, режиссёрлы, цехъясса уджалысьяслы. Виччысям выль спектакльясöн.»

А ми виччысям регыд Удмуртияса вужвойтырлöн театрлысь воча волöмсö. Май 18-19 лунъясö Бабушкин улича, 4 керкаын лоасны налöн спектакльяс: «Капитанская дочка» (А. Пушкин серти романтическöй драма, рочöн), «Царевна-лягушка» мойд (рочöн жö). Удмурт кыв вылын роч вылö синхроннöя вуджöдöмöн лоас «Эрико яратон» (Свободная пара) теш. Билетъяс вузассьöны нин.

Абъячойса конференция вылын

«Горш тулыслöн» премьера эз ло öтка лоöмторйöн, кодöс сиöма В. Лекановлöн 100 во тырöмлы. Абъячойын нуöдiсны конференция да театральнöй рыт. Буретш танi чужлöма тайö нималана мортыс.

Тайö вöлi март 26 лунö. Миян театрысь ветлiсны артистъяс – Сергей Туркин да Елена Чувьюрова, да художествоа веськöдлысьлöн отсасьысь Владимир Урнышев.

В.В. Юхнин нима библиотека котыртiс «Коми драматург В.Д. Лекановлöн творческöй наследие» конференция, докладчикъяс сёрнитiсны комиöн. Висьталiсны, шуам, сы йылысь, мый Василий Дмитриевичлöн чоя-вока тшöтш пуктiсны пай Коми мулöн сöвмöмö – Яков Дмитриевич вöлi техника наукаясса доктор, профессор, Госпремияа лауреат, Екатерина Дмитриевна – каналан деятель, республикаса йöзкост хозяйствоса заслуженнöй уджалысь. Владимир Урнышев висьталiс гижысьлöн пьесаяс йылысь, мый вöлi пуктöма миян театрын, да козьналiс библиотекалы Лекановлöн спектакльяс фотояса альбом. Конференция вылын сёрнитiсны и школьникъяс.

Мероприятие вылö локтысьяслы петкöдлiсны Абъячой сиктсö, нуöдiлсны Яборов нима краеведческöй музейö, районнöй серпас галереяö, кöнi буретш вöлi Леткаса художник Нина Елиналöн выставка.

Сэсся вöлi литература да театрлы сиöм рыт. Юргисны В. Леканов йылысь казьтылöмъяс, сёрнитiс сыкöд öттшöтшъя Елизавета Васильевна Галева (сiдзкö, сё арöса!), коми гижысьяс Елена Козлова, Галина Бутырева, Куратов нима музейöн веськöдлысь Диана Холопова. Ассьыс кывбуръяссö лыддис Татьяна Канова. Но а сэсся миян актёръяс Елена Чувьюрова да Сергей Туркин ворсiсны «Горш тулысысь» серамбана юкöн. Чёрнышса культура керкасаяс петкöдлiсны «Кык дӧвеч да дӧва» ворсанторйысь юкöн. «ГТРК Коми гор» архивысь вöлi петкöдлöма В. Лекановыскöд интервью, «Ар – гӧтрасян кад» видеоспектакльысь юкöн (дерт жö, миян театрлöн ворсöмöн), драматург Александр Ларевкöд интервью, кöнi сiйö сёрнитiс Леканов йылысь. Рыт помын сьылiс «Лизавета» фольклор котыр, кöнi петкöдчö Лекановлöн воча чойыс  -  Лидия Ивановна Лобанова.

Со тадз лöсьыда нимöдiсны тöдчана коми драматургöс Абъячойын.

"Горш тулыс" премьера

Со и петкöдчим выль спектакльöн. Василий Лекановлöн "Горш тулыс" чукöртiс кык рытö тыра залъяс. И видзöдысьяс колисны дöвöльöсь. Зэв нимкодь кывны залын пукалiгöн, кыдз видзöдысьясыс ньöжйöника комментируйтöны, мый аддзöны, тöждысьöны геройяс вöсна: "Кагаыс-тö художниксö радейтö", "Сiйö öд гöтыра да челядя", "А, тайö зятьыс и эм?" Нöшта нимкодь кывны öтув гора сералöмсö - тайö ёна кыпöдö ловтö. Кöть и синваыд петыштлiс жö.

  Унаöн тöдчöдöны Ангелина Шаховалысь бура ворсöмсö - став сьöлöмсяньыс пырöдчис героиняас, сылöн аскылöмас, лолас. 

Дерт, серамсö петкöдлiсны миян верстьö артистъяс, теш ворсны мастеръяс - Сергей Туркин (Пантиль) да Елена Чувьюрова (Фотинья). 

Пантильлöн тешкодь характерыс - пыр видзöдö, мед крукыштны начальник Яков Яковлевичсö. А Фотинья да Пантиль костын сёрниысь позьö вöчны торъя юмористическöй петкöдчöм. 

Мичмöдiсны спектакльсö кывбуръяс - режиссёрлöн мöвп серти ми кылiм на пыр геройяслысь пытшкöсса майшасьöмъяссö. Тайö лирикаа кывбуръяссö гижисны А. Елфимова, А. Ельцова, О. Уляшев, Э. Тимушев. Кыдз шуисны кодсюрö видзöдысьяс пöвстысь, кывбуръясыс пö - зэв бур мöвп, найö ладмöдöны важ пьесасö öнiя олöмыскöд, мичмöдöны пуктассö.

Виччысям и тiянсянь, пыдди пуктана видзöдысьяс, отзывъяс премьера серти. Верманныд гижны татчö либö Контактын: www.vk.com/komiteatr

"Самöвар" видеоклип

Паныдалöй театрлысь выль петас - "Самöвар" сьыланкыв вылö клип! Видзöдам, нимкодясям, йöктам! Сэсся юксям тöдсаяскöд! И дерт, сьылам öтлаöн "Парма" ансамблькöд гажа кыпыд сьыланкывсö!

Коми сьыланкывъяса клипъяс

Регыд интернетын пукалысьяслы да весиг телевизор видзöдысьяслы мойвиас аддзыны миян артистъясöс мича клипъясын. Юксям тiянкöд таöн да неуна кыйöдчыштам, кыдзи снимайтiсны клипъяссö. Кыкнан сьыланкывйыс - Сыктывдiнса Ирина Чувьюровалöн кипомысь.

Öтиыс - "Лым" - сьылö Аня Попова. Снимайтiс КомиPro.

 Мöдыс - "Самöвар", сьылö "Парма" ансамбль. Cнимайтiс "Новая идея".

Регыд клипъяс лоасны дасьöсь. Виччысьöй!

Коми театр да Леканов

Март 13 лунö Василий Дмитриевич Лекановлы тырис эськö 100 арöс. Нималана драматурглысь юбилейсö пасйöмöн Коми Республикаса вужвойтырлöн шылада-драмаа театр  лэдзö выль пуктас – «Горш тулыс».

В.Д. Леканов

Василий Дмитриевич йылысь аслас казьтылöмъяснас юксис театрын художествоа уджöн веськöдлысь Светлана Гениевна Горчакова, кодлы удайтчылiс öтлаöн уджавны тайö енбиа да шань мортыскöд Савин нима драма театрын.

В. Леканов уна во артисталiс театрас, сылöн вöлi актёрскöй образование. Сэсся 1971-78 воясын уджалiс Коми гижысь котырöн веськöдлысьöн. Сылöн ки помысь петлiс уна пьеса: «Йöлöга», «Удоратинъяс», «Сиктса рытъяс»... Найöс и öнi позьö пуктыны, кад вылö видзöдтöг: найö петкöдлöны оз эпоха, оз революция бöрся кад. Найö – морт лов, морт олöм йылысь. Сы вöсна и видзöдысьяс дыр кад чöж радпырысь ветлiсны спектакльяс вылас. И драмтеатр, и шылада-драмаа театр пуктылiсны сылысь «Олöмын бужöдъяс». А öнi нöшта и «Горш тулыс» петкöдчас выль пöв.

Ас кадö тайö пьесаас Юрий Романовöс ворслiс Михаил Смолев, а öнi, шылада-драмаа театрын, кутасны ворсны том артистъяс Валериан Канев да Семён Горчаков. Фросяöс ворсiс Ангелина Пувкоева, а öнi – Альбина Карманова да Кристина Коснырева. Председатель Яков Яковлевичöс – Василий Рассыхаев, а öнi – Андрей Засухин. Но а медшöр героинясö, Христинаöс, ворслiс тайö спектакляс ачыс Светлана Горчакова. Öнi тайö рольсö сiйö, кыдз режиссёр, сетiс том артистка Ангелина Шаховалы.

Фото вылын: Христина - С. Горчакова, Фрося – А. Пувкоева. 1978 во, режиссер - И. Аврамов

Светлана Гениевна казьтылö, кыдз Василий Лекановкöд найö ветлывлiсны гастрольяс вылö. Сэки гастрольяс вöлiсны кузьöсь – сизимдас лун колö вöлi кывтны Эжва да Печора кузя катерöн да быдлаын ворсны öти и сiйö жö спектакльсö. Мукöд дырйи вöлi вошан лунъясас, кымынöдысь нин ворсан öтиторсö. А сэтшöм йöзыс пö, кыдз Василий Дмитриевич, мичмöдiсны тайö быдлунъя öткодьлунсö: татшöм шмоньлив, бур сьöлöма, югыд мортсö шоча аддзан. Радейтiсны сiйöс кывзыны том артисткаяс – век мыйкö шмонитö, висьтасьö. Некор эз лёкавлы, вöлi зэв уджач, и гöтырыс, артистка Клара Матвеевна Леканова, сыкöд пыр орччöн вöлi.

Сэтшöм ыджыд йöз дорас сэкся правительстволöн вöлi и пыдди пуктöмыс ыджыд: шуам, юбилейнöй рытъяс вöлi пыр вöчöны. Медбöръя юбилей вылас, 70 арöс тыртiгас, ветлiс и Светлана Горчакова. Официальнöй юкöн помын найö некымынöн артистъяс пиысь пыралiсны Лекановъясö гортас тшай юны. Зэв дыр пызан сайын варовитiсны, гигзисны-сералiсны Василий Дмитриевичлöн шмонь вылас - висьталiс театральнöй олöмысь вöвлöмторъяс. Зэв сэки окота лоöма босьтны магнитофон (зэв этшалöн сэки вöлi) да гижны плёнка вылö сылысь висьтасьöмъяссö, паметь вылö. Но сiдзи эз и удайтчыв. И недыр кад мысти Василий Леканов эз ло.

Светлана Гениевналы важöнсянь нин вöлi кажитчö «Ар – гöтрасян кад» пьесаыс. Весиг мöвпалiс драмтеатрын на пуктыны. Тайö – гажа, шмоньлив спектакль, кыдзи и аслас Лекановлöн сямыс, руыс. Шылада-драмаа театрын тайö спектаклыс мунiс 20 сайö во, и пыр сы вылö вöлi локтöны видзöдысьясыс.

«Горш тулыс», кöть и мыйöнкö öтсяма сыкöд, - тайö абу нин комедия. Драмтеатрын сiйö вöлi пуктöма ёнджыкасö кыдз драма. Но збыльджыкасö  тайö мелодрама. Том йöзлöн сьöлöмкылöмъяс йылысь, том кадлöн – кодi и эм «горш тулысыс» - радейтны кöсйöм йылысь.

Сэки, 70-80-öд воясö, кор йöзлöн олöмыс вöлi мöдджык, рытъяснас вöлi прöст кад да эз кут ас дорас телевизор да интернет, театр вылö видзöдласыс вöлi мöдджык. Спектакльяс вылö сэки ветлiсны зэв кыпыда да окотапырысь, зэв пыдiа кылiсны сценавывса олöмсö, быттьö збыльвывсаöс. Василий Лекановлöн вöлi ыджыд драматургическöй талант. Окота эськö, мед и öнiя кадö сылöн гижöдъясыс ышöдасны бур вылö уна видзöдысьöс. 

"Горш тулыс" спектакльлöн премьера лоас март 23 да 24 лунъясö 18.00 часын.

Театрлöн адрес: Сыктывкар, Бабушкин улича, 4 керка.