«Эзысь шабді» Москваын.

 Коми Республикаса вужвойтырлӧн шылада-драмаа театр Коми Республикалы 100 во тыригкежлӧ петкӧдчис «Эзысь шабді» выль спектакльӧн «У Никитских ворот» Москваса театрлӧн сцена вылын. Залыс тӧрӧдіс мыйта позьӧ уна видзӧдысьӧс.

Марк Розовскийлӧн театрын уджалысьяс зэв бура примитісны коллективнымӧс, гортын моз. Быдторйын отсалісны. Спектакль водзын театр администрация нимсянь коми коллективнымӧс чолӧмаліс Семён Маркович Розовский, коді вӧлі кураторӧн миян театрлы гастрольяс дасьтігӧн да нуӧдігӧн. Петкӧдчӧм вылӧ волісны и Москваса олысьяс, и Комиысь петлӧм войтыр, фин-угор странаяс да регионъясысь йӧз, Федерация Сӧветын Комиӧс петкӧдлысьяс, театральнӧӥ критикъяс, учёнӧйяс, театральнӧй вузъясын велӧдысьяс да велӧдчысьяс. Ставныс окотапырысь пырӧдчисны коми традицияяс да гажъяс руӧ, пӧся примитісны и уна гӧлӧса сьыланъяс, и теш петкӧдлысь сценаяс. Видзӧдысьяс пиысь унаӧн юксисны премьера вылӧ асланыс видзӧдласнас.

 

Елена Шумилова, Россия Федерациялӧн Федеральнӧй Чукӧртчӧмлӧн Федерация Сӧветӧ пырысь:

«Меным зэв мойвиис: кор ме вӧлі тележурналистӧн, ме тайӧ спектакльсӧ снимайтлі тані жӧ, Москваын, войтыръяскостса театральнӧй фестиваль вылын, и сэки сійӧ вермис некымын номинацияын. Тайӧ вӧлі дас квайт во сайын. И миян артистъяслы аплодируйтісны сувтсӧн став йӧзыс. Татшӧм спектакльыслӧн кадыс абу. Быд мортлы, кӧть пӧрысьлы, кӧть томлы пырӧ сьӧлӧмас. И кыдзи артистъяс ворсӧны, кыдз сьылӧны, кыдзи олӧны сцена вылын – тайӧ кывйӧн сідзи он на висьтав, тайӧс колӧ аддзыны.»

 Валерий Марков, 2015 – 2020 воясса Россия Федерациялӧн Федеральнӧй Чукӧртчӧмлӧн Федерация Сӧветӧ пырысь:

«Ми аддзам, мый театрса коллективас ӧтлаынӧсь и найӧ, кодъяс вӧлісны комын во сайын, и выльяс, кодъяс локтісны сӧмын на, и тайӧ ӧтувъя уджыс сетӧ зэв ыджыд лача водзӧ вылӧ, мый кутас на кывны коми кывйыс, коми сьыланыс, коми йӧктӧмыс, коми фольклорыс, коді вуджӧма миян бабъяссянь-дедъяссянь. Муӧдз копыр тіянлы!» 

 

Владимир Сажин, Б. Щукин нима театральнӧй институтса доцент:

«Ме коллялі 2,5 час зэв бура. Яръюгыд, аслыспӧлӧс, ыззяна, унатор висьталысь спектакль. И быттьӧ ставыс тӧдса, но вӧлӧмакӧ, ми збыльвылас сэтшӧм этша тӧдам войтырлысь праздникъяссӧ, традицияяссӧ, шусьӧгъяссӧ. Видзӧді ставсӧ кокниа, ӧти ловшыӧн, нимкодьпырысь кывзі вуджӧдӧмсӧ, сьӧлӧм пыр нуӧді спектакльсӧ. Сэтшӧм окотапырысь актёръяс олісны материалас. Ворсысьясыс - и томъяс, и нималана артистъяс ӧти сцена вылын ӧтув командаын. Торйӧдны весиг некодӧс, ставныс ӧта-мӧдыскӧд уджалісны топыд йитӧдын, вильшасисны сцена вылын. Ме рад вӧлі аддзыны ассьым велӧдчысьясӧс, кодъяс пырисны коллективас. Оз век татшӧмыс овлы, быдногыс артисталан судьбаыс бергӧдчӧ. А локны некымын во мысти «отчётӧн» Москваӧ – тайӧ, ме чайта, налы сьӧлӧм вӧрзьӧданатор. Менам сьӧлӧмӧй бурмис. Регыдджык мед эськӧ тіян театрын ремонтыс помасис, мед артистъяс бара кутісны петкӧдчыны ас сцена вылын».

 Ольга Лысенко:

«Май 28-öд лунö ми чойяскöд ветлiм «Эзысь шабдi» спектакль вылö. Театрыс aбу ыджыд, залыс уютнöй. Майбыра ставыс колис, сьöлöм мылыштмöн. Быттьö Чужанiнным ачыс матыстчис миян дорö, ыджыд суетнöй карö. Спектакль - праздник, сьöлöм шымыртана, лов кыпöдана-шызьöдана. Син водзö пыр и сувтiс пöль-пöчьяслöн важъя олöмыс, ыджыд мамлöн вышивайтöм дöраясыс, мелi сëрниыс да кужысь киясыс, чöскыд шаньгаяслöн кöрыс да кузь помтöм сьыланъясыс. Став коми театр котырлы сиа крепыд дзоньвидзалун, водзö вылö уна выль удж да уна коми видзöдысьöс быдлаын, кытöн тi петкöдчанныд! Ыджыд аттьö пьесалöн авторлы, режиссëрлы, актëръяслы да быдöнлы, кодi дасьтiс тайö бур уджсö! Аддзысьлытöдз!»

 

Наталия Рочева:

«Нелямын морта котыр воис Москваӧ, мед петкӧдлыны миян коми кывнымлысь став мичлунсӧ, тӧдмӧдны миян войтырлӧн традицияяскӧд. Сюжетыс мунӧ сиктса овмӧслӧн вогӧгӧрся уджъяс серти. Шабді тусь - кыдз олӧм пас, кӧдзӧмсяньыс шабді дӧраӧдз. Сюжетӧ пыртӧма-кыӧма шӧр геройяслӧн медводдза радейтчӧмсӧ. Сёысь унджык шензьӧдана мича костюм спектакляс! Мыла коми сьыланкывъяс, йӧктӧмъяс, обрядъяс, гажъяс – миян чужанінлысь мичлунсӧ и видзӧдысьяс вылӧ донъялісны. Та йылысь висьталісны и дыр нюжалысь аплодисментъяс, и уна-уна цвет, кодъясӧс козьналісны видзӧдысьяс артистъяслы да театрса веськӧдлысьяслы. Аттьӧ ставныслы, кодъяс уджалісны тайӧ постановка вылын, ті вайинныд миянлы Москваӧ чужан Коми мулысь юкӧнсӧ! Аттьӧ землякъяслы, кодъяс воисны видзӧдлыны миян артистъясӧс.»

 

Слава Киктев:

«Волім шензьӧдана «Эзысь шабді» спектакль вылӧ. «У Никитских ворот» театрын талун вӧлі аншлаг! Спектакльыс муніс комиӧн роч вылӧ вуджӧдӧмӧн. Аттьӧ став актёръяслы да торйӧн спектакль пуктысьлы Светлана Горчаковалы тайӧ уджсьыс!»

 Людмила Великорода, Москваын Коми землячествоӧн веськӧдлысь:

«Мича, интереснӧй петкӧдчӧм Коми национальнӧй театрлӧн вӧлі петкӧдлӧма Москваса видзӧдысьлы. Шӧр визьыс спектакльын артмӧма комилӧн медся тӧдчана праздникъясысь, обрядъясысь, а на пиӧ пыртӧма йӧз костын йитӧдъяс, характеръяс, сьӧлӧмкылӧмъяс. Зэв мича югыд костюмъяс тӧдчӧдісны и коми йӧзкостса йӧктӧмъяслысь да сьыланъяслысь мичлунсӧ. Видзӧдысьыс позяна уна, дыр кекӧначасьӧм, цветъяс, овацияяс – артистъяслӧн да театрса веськӧдлысьяслӧн уджыслы зэв бур кывкӧртӧд.»

Май 31 лунӧ коми театрса артистъяс кыпыда петкӧдчисны Коми Республикалы 100 волы тырӧмлы сиӧм гала-концертын, коді муніс Москваса Ыджыд театрын. Июнь 7 лунӧ артистъяс петкӧдчасны и Санкт-Петербургын.

Видзӧдыссянь письмӧ

 Миян дона ёртъяс-видзӧдысьяс! Ті миянӧ тшӧкыда гижланныд - коді корӧ волыны аслас сиктӧ спектакльӧн, коді аттьӧалӧ волӧмысь, коді вӧзйӧ пуктӧм вылӧ ассьыс гижӧд... Аттьӧ, мый юксянныд миянкӧд асланыд мӧвпъясӧн, миянлы нимкодь! 

Ті тӧданныд, мый миян театрлы кӧсйысисны лэптыны выль керка - Сыктывкарса Октябр шӧртуй да Оплеснин улича туйвежын. Кымын во мысти ми вуджам мича выль стрӧйбаӧ, некод на оз тӧд, но кутам лача, мый ставыс ладмас.

Талун кӧсъям юксьыны тіянкӧд письмӧӧн, коді воис театрӧ некымын лун сайын. Гижысьыс, Валентина Ивановна (овсӧ абу пасйӧма) тӧждысьӧ театрлы стрӧйба кыпӧдӧм йылысь.

"Баба гожӧм" премьера

Март 1 лунö Коми Республикаса вужвойтырлöн шылада-драмаа театр петкöдлiс премьера. Алексей Поповлöн пьеса серти шылада теш «Баба гожöм» чукöртiс искусствояс гимназияын зал тыр йöз. Спектакльсö пуктiс Россияса искусствоясын заслуженнöй деятель, Коми Республикаса народнöй артистка Светлана Горчакова.

Сюжет серти ылi коми сиктын олысь аньяс шогсьöны-корсьöны ассьыныс муслунсö. Ыкшалун, вежöгтöм сувтöдöны мытшöдъяс. Нöшта на и виччысьтöм лоöмторъяс да кöнсюрö гöгöрвотöмлун артмöдöны серамбана визьсö. Татчöс йöзыс олöны важъя оласногöн, кыдзи войдöр олiсны комияс. Найӧ кыӧны вӧньяс да дӧраяс, мастеритӧны туисъяс. Геройяс йитчöны öта-мöд костас – и кыöны олöмлысь дöрасö, налöн сунисъясыс то öтлаасьöны, то торъялöны. Нывъяс, кыдз и важ кадӧ, асьныс вурӧны-кыӧны приданöйсö.

Спектакльын ворсöны: Настя - КР-са народнöй артистка Валентина Соколова, Васьӧ - КР-са народнöй артист Александр Ветошкин, Марья - КР-са заслуженнöй артистка Альбина Карманова да артистка Карина Игнатова, Дарья - КР-са заслуженнöй артистка Зоя Осипова, Павел - артист Александр Канев.

Урасьöм 12 лунö ассьыс юбилейсö пасйис Коми Республикаса народнöй артистка, республикаса Правительстволöн премияа лауреат Валентина Соколова. Со мый висьталiс актриса аслас выль роль йывсьыс:

«Ме ворса аньöс, кодi виччысьö ассьыс шудсö, а сiйö вöлöма орччöн. Тайö лирическöй, но и збой героиня. Тайö спектакляс ме восьта ассьым выль творчествоа визь: веськыда спектакль дырйи кута кыны вöнь, ичöтик станок вылын, кодöс вöчисны миян кужысь бутафоръяс. Водзынсö татшöмторнас эг на ноксьывлы. Спектакльын лоас зэв мича антураж, мый отсалас артмöдны сiйö мöвпсö, кодöс пьесаас пуктiс автор да сцена вылын восьтiс режиссёр да ми, актёръяс. Модельер серпасалiс мича паськöм. А нöшта пуктасыс зэв мыла шылада. Ме кута сьывны Василий Гущинлысь «Арся», Александр Уляшевлысь «Юыс менö кылöдö» да Пётр Шучалинлысь шмоньсора «Вай ме тэнö окалышта» сьыланкыв.»

Да, збыль, спектакльын уна мича сьыланкыв, унджыкыс дзик выль. Сьыланкывъяссӧ бӧрйӧма сідз, мый найӧ бура йитчӧмаӧсь спектакль сюрӧсыскӧд.

Март 1 лунӧ спектакльыс колис зэв кыпыда, серамыс залын кылiс воддза минутасянь да помöдзыс.

Пьеса авторыс Алексей Вячеславович Попов, дерт жö, волiс премьера вылö да сы бöрын юксис аслас кыпыд сьöлöмкылöмнас:

«Премьера зэв бура мунiс. Ставыс ас местаын. И ворсöмыс, и сцена мичмöдöмыс. Быттьö öти лолысь ставыс петiс. Та вöсна и йöзыс зэв бура примитiсны. Бöрас öти олöма нывбаба аттьöавны матыстчылiс. Тыдалö, инсульт бöрын: кывнас висьтавны эз нин вермы, но шуда синваыс тюрöбöн кутiс лэччыны. Быттьö став йöз нимсяньыс миянöс аттьöалiс. Тайö пö и öнiя кадö миянлы эз тырмы.»

Зэв бур кывъяс шуалiсны и Зеленечса видзöдысьяс. Налöн сиктын премьераыс мунiс весиг водзджык, февраль 27 лунö:

Ирина Белых: «Зэв гажаа да мичаа петкöдчисны «Баба гожöм» выль премьераöн Коми республикаса вужвойтырлöн шылада-драмаа театр. Спектакльыс сиктса нывъяслöн öтка олöм да пара пöвсö виччысьöм йылысь, но помасьö ставыс бурöн. Сьылicны дас кык, а гашкö, и дас куим выль, мича, сьöлöм вöрзьöдана коми сьыланкыв!»

Пасъя, коді эз веськав премьера вылӧ, вермас волыны апрель 9 лунӧ искусствояс гимназия залӧ да видзӧдны тайӧ петкӧдчӧмсӧ. Видза корам!

Паныдасям «Коми рытъяс» вылын!

2019 воын Россия пасьта пасйыссьö Театр во, а Коми Республикаын – нöшта и 100 во коми театрлы. Тайö кыкторйыс корöны нöшта пыдiджыка миян олысьяслы пырöдчыны театр искусствоö.  Коми театрлöн тшупöда кадколаст пасйöм могысь Сыктывкарын мунас театральнöй фестиваль.

Тöлысь чöж, ноябрь 1 лунсянь декабрь 1 лунöдз «Коми рытъяс» чукöртасны республика пасьталаысь народнöй да самодеятельнöй театральнöй котыръясöс. Петкöдлыны ассьыныс коми кывъя пуктасъяссö воасны 15 театр Кöрткерöс, Кулöмдiн, Емдiн, Сыктыв, Сыктывдiн, Изьва, Ухта районъясысь. Сiдзжö петкöдчасны Сыктывкарса школаясысь челядьлöн театр коллективъяс. Фестивальса гöсьтъясöн лоасны Сольвычегодскысь да Ханты-Мансийскысь театръяс.

Фестиваль воссис кыпыд концертöн, кытысь позис аддзыны и профессиональнöй коми артистъясöс, и став республика пасьтаысь воöм артисталан сяма войтырöс. Петкöдчöмыс тöдмöдiс коми театрлöн историяöн, медтöдчана йöз да лоöмторъясöн. 

"Коми рытъяс" фестиваль воссис кыпыда

Фестивальсö котыртö Коми Республикаса вужвойтырлöн шылада-драмаа театр регионса юралысьлöн грант отсöгöн. Шог вылö, аслас сцена вылын примитны коллективъяссö вужвойтыр театр оз вермы – дыр нюжалысь ремонт оз сет восьтыны залсö. Фестивальса спектакльяссö лоö петкöдлöма Сыктывкарса администрация залын (Бабушкин ул., 22), «Октябрь» шойччан да кино шöринын (Советскöй ул., 53), Сыктывкарса коми культура шöринын (Бабушкин ул., 31), Коми Республикаса войтырлöн ёртасян керкаын (Ленин ул., 74). Пöшти став спектакльыс мунас ноябрса шойччан лунъясö – мед и ворсысьяслы кокниджык вöлi локны, öд ставныс найö – уджалысь либö велöдчысь йöз, и видзöдысьлы шойччигмоз коллявны прöст кадсö.

 «Коми рытъяс» нимыс ыстö миянöс пöшти сё во сайся лоöмторъяс дiнö, кор Нёбдiнса Витторлöн веськöдлöм улын театрын ворсысь чукöр нуöдлiс театральнöй рытъяс республика пасьта. Тайö «Коми рытъясыс» вöлiны сэтшöм коланаöсь, мый залъясын йöзлы эз тырмывлы местаыс, а рытыс нюжöдчывлiс асылöдз, кор ворсывлiсны эз сöмын коми пьесаяс, но и гораа лыддьысьлiсны, нуöдлiсны лекцияяс, сьылiсны-йöктiсны. Фестиваль котыртысьяс эскöны, мый и öнiя рытъясыс лоасны сэтшöм жö шоныдöсь да гажаöсь.

Бура прöйдитiсны и медводдза спектакльясыс. Ми удитiм нин видзöдны Кöрткерöсса народнöй театр, кодi петкöдлiс Олег Уляшёв серти «Шондiбанöй-олöмöй» драма да Висер сиктса "Майбыр кад" театрлысь «Олöмын бужöдъяс» драма В. Леканов серти.

Кöрткерöсса народнöй театр, "Шондiбанöй-олöмöй" спектакль

Кöрткерöсса народнöй театр котыртчöма 1946 воын, а кызь во мысти сетiсны «Народнöй» ним. Коллектив нималö республика пасьта, лолiс КР-са Госпремияа лауреатöн, шедöдлiс медводдза местаяс фестивальяс вылын. Тайö театрыс пуктылiс татшöм коми спектакльяс, кыдз Алексей Попов серти «Кöнi, мусаöй тэ менам?», «Коркö öд аддзысям», Николай Белыхлысь «Анисья», Михаил Лебедевлысь «Мича ныв». Кöрткерöсса народнöй театр новлö Надежда Михайловна Клермонлысь ним. Веськöдлö театрöн Анастасия Анатольевна Казакова – Коми Республикаса культураын почёта уджалысь, Коми Республикаса Госпремияа лауреат.

«Шондiбанöй-олöмöй» - тайö Олег Уляшёвлöн «Гытсан» пьеса серти пуктас. Видзöдысь сунö сё восайся кадö коми сиктö, сэкся оласногö... Семьяын вöлi кык верстяммöм ныв. Ичöтджыкыс аддзöма нин аслыс муса зонмöс да надейтчö, мый сiйö сы вылö гöтрасяс. Корасьысьяс збыльысь локтöны налöн керкаас, но ставыс бергöдчö дзик мöдарö… Ставсö и став йылысь водзвыв тöдö Горань – олöм кутысь, юöр вайысь – сöмын сылы воссьö йöзлöн олöмыс да кодлы кутшöм пай вичмас.

Светлана Ивашева, «Шондiбанöй-олöмöй» спектакльын Ичöт Нылöс ворсысь: «Зэв сьöкыда сетчис рольыс, сы вöсна мый колö шогсьыны, бöрдны, а ме велалi олöмас ачым ассьым шудöс корсьны да не шогсьыны. А сэсся кыдзкö пыри роляс да быттьö аслам шог шога. Бöрда весиг збыльвылысь. Ворсны кажитчö, сы вöсна мый асьтö кылан мöдджык боксянь, велöдчан колана ногöн сёрнитны, мöвпавны, шогсьыны. Быттьö тэ абу ачыд, быттьö мöд олöм олан.»

 

Светлана Ивашёва - Ичöт ныв рольын

Висерса «Майбыр кад» театр коллектив артмис 2008 воын. Ас сиктын да матiгöгöрса сикт-грездын котыр петкöдлывлiс Нина Куратовалысь «Кык бать», Александр Ларевлысь «Прöщай, любовь», Виктор Савинлысь «Парма ныв» да мукöдъясöс. Бöръя вояссö пуктывлiсны выльвося шылада мойдъяс. Котырöн веськöдлö Пинягина Оксана Васильевна.

Сиктъясын пыр тöдчымöн унджык артисталысь, сьылысь-йöктысь аньыд, а мужичöйыд пыр этшаджык. Шуд вылö, Висерын найö сюрисны - «Олöмын бужöдъяс» драмаын ворсысь мужичöйяс петiсны сцена вылö медводдзаысь буретш тайö спектакляс. Михаил Макаров – химия да математика велöдысь, ворсö шöр геройсö, Александр Габов – совхозса слесар, куим челядя бать – ворсö мöд тöдчана геройсö, Василий Подоров – вит челядя бать, ворсö Данько-матросöс. Быд концерт да пуктасын петкöдчöны и сиктса аньяс – Людмила Габова – школаса завхоз, нёль челядя мам, Анна Попова – школаса сёянiнын уджалысь, Жанна Макарова – почтальон. А Нина Кетовалöн сцена вылö петiгöн нин йöзыс сералöны – сэтшöма мортыс кужö ворсны тешсö. «Олöмын бужöдъяс» спектакльын сюрӧсыс гартчӧ мыжтӧг мыжалӧм Исаковлӧн олан туйвизь гӧгӧр. Сӧстӧм радейтчӧм да ковтӧм вежӧгтӧм, уджын зiльысьяс да кыккирудз пукалысьяс, удтысьысь да веськыд этша геройяс паныдасьӧны петкӧдчӧмын.

Висер сиктса "Майбыр кад" театр, "Олöмын бужöдъяс" спектакль

Воасны нöшта куим народнöй театр: Помöсдiнса  петкöдлас Николай Чугаевлысь «Ыргöн чунькытш» мелодрама, Визинса – Валентина Лекановалысь «Сёрмöм шуд», Выльгортса – сылöн жö пьеса серти «Югъялан кодзув». Кöрткерöс районысь лоас нöшта Шойнатыса театральнöй коллектив, кодi петкöдлас Эвелина Пиженколысь «Бабаяс» теш. Тайö Ухтаса авторыслысь нöшта öти спектакль петкöдлас Зеленечса котыр – теш нимыс «Радейтчöм да колльöдчöм». Сыктывдiн районысь сiдзжö лоас Шошкаса котыр, кодöн веськöдлö Ирина Чувьюрова. Коллективыс петкöдлас Ирина Ивановнаöн гижöм-дасьтöм шылада теш, кодi шусьö «Кодкö сайö пета на…». Изьва районысь воö куим коллектив – Изьвасаяс вайöны Нина Обрезковалысь «Но и бабаяс!» теш, Мокчойысь – «Лöз чышъян» сьöлöм вöрзьöдана спектакль, Галфедь грездысь котыр вайö «Дона зять» теш. Ухтаса культура шöринса котыр дасьтö öти акта тешъясысь шмонь рыт. Емдiн районса Айкатылаысь петкöдласны Г. Юшковлысь «Гöтыртöгыд абу олöм» теш. Ассьыс спектакль фестиваль кадö петкöдлас и котыртысьыс – шылада-драмаа театр.

Архангельск обласьтса Сольвычегодск карысь «Мозаика» театр ваяс коми гижысь Алексей Поповлысь пьеса – «Одеяло алкашам не положено». Сiдзжö ми аддзылам рöдвуж войтырлысь аслыспöлöс пуктасъяссö – Сыктывкарын петкöдчас Ханты-Мансийскысь «Об-угор войтыръяслöн «Шондi» театр».

 «Коми рытъяс» кадö театр сигöртас нöшта öти ассьыс мöвпыштöмтор – «Теш тыш» шмонь гижöдъяслысь конкурс. Конкурсö февраль тöлысьсянь пырöдчисны республикаса кар-районъясысь комиöн гижысь йöз. Найö ыстiсны театрлы неыджыд пьесаяс да серамбана висьтъяс. Национальнöй политика министерство отсöгöн театр лэдзас на пиысь медбур гижöдъяссö торъя небöгын, кодi сiдзи и кутас шусьыны – «Теш тыш». Тайö небöгыс «Коми рытъясö» локтысь коллективъяслы лоö буретш – öд сэтысь найö вермасны бöрйыны водзö вылö пуктантор.

Ассьыныс заявкаяссö фестиваль вылö ыстiс унджык коллектив, но, кöть и эз ставныс пырны фестивальлöн репертуарö, век жö зэв нимкодь, мый коми йöзлöн, кодъяс асланыс уджысь öтдор ворсöны сцена вылын, да нöшта и чужан кывйöн, эм кöсйöмыс да сямыс тайöс вöчны. Öд и ворсысьыслы нимкодь, и сы вылö видзöдысьлы кыпыд сьöлöм вылас коми кыв юргöмысь. Вайö жö и ми, кыдз видзöдысьяс, волам да пöттöдз нимкодясьыштам сöдз коми кывнас да сьöлöмсянь ворсöмнас, тадз нöшта и отсалам видзны-сöвмöдны коми кывнымöс да коми драматургиянымöс!

Коми театр корö шмонитны, ворсны да велöдчыны.

Россияса театр волы да коми театрлöн 100 во тырöмлы миян театр сиö уна проект. 

Ноябрь тöлысьын театр котыртö «Коми рытъяс» фестиваль. Öнi театр чукöртö заявкаяс. «Коми рытъяс» фестиваль öтувтас республикаса медбур профессиональнöй, йöзкостса да любительскöй театр коллективъяс. Фестиваль нимыс ыстö миянöс пöшти сё во сайся лоöмторъяс дiнö, кор Нёбдiнса Витторлöн веськöдлöм улын театрын ворсысь чукöр нуöдлiс театральнöй рытъяс Республика пасьта. Тайö «Коми рытъясыс» вöлiны сэтшöм коланаöсь, мый залъясын йöзлы эз тырмывлы местаыс, а рытыс нюжöдчывлiс асылöдз, кор ворсывлiсны эз сöмын коми пьесаяс, но и гораа лыддьысьлiсны, нуöдлiсны лекцияяс, сьылiсны-йöктiсны. Петкöдчыны фестивальын вермас любöй театральнöй котыр, кодi ворсö коми кыв вылын. Туйö Сыктывкарöдз да бöр, карын куим луна овмöдöмсö мынтас фестиваль вылö воысь коллективъяслы театрыс – Коми Республикаса Юралысьлöн грант отсöгöн. «Коми рытъяс» лоасны Коми Республикаса шылада-драмаа театрса сцена вылын ноябрь тöлысьын, а öнi театр виччысьö колективъяссянь заявкаяс. Фестивальлöн гöгöрвоöдöмыс да заявка балаыс эм komiteatr.ru сайт вылын.

«Теш тыш» серамбана гижöдъяс конкурс. Быд коми морт вермас ыстыны театрö ассьыс гижöдтор – серамбана пьеса либö миниатюра, кодöс эськö позис пуктыны театрын. Арын жюри, кытчö пырöны театрын творчествоа уджалысьяс, коми гижысьяс, литература туялысьяс, донъяласны да бöръясны медбуръяссö. Водзö тайö гижöдъяссьыс артмас серамбана концерт либö спектакль. Öнiя кад кежлö ыстöм гижöдъясысь лои пуктöма нин сцена вылö öтиыс - Висер сиктса Екатерина Михайловалöн "Сизим невеста" ичöт пьеса. Видзöдысьяс сералiсны, кöть, шуам, висьталанторйыс и курыд помкаа: война бöрын сиктö бöр воис сöмын öти мужичöй… Но öд том да ворсысь вир-яя аньяслы кöть кутшöм кадö муслуныд колö! Со и чукöртчисны сизим öтка нывбаба, мед юкны öтка мужикуловсö – Микулаюшкосö. Кыдз тыдовтчис, выль пуктöмыс кажитчис видзöдысьяслы.

Öнiя кад кежлö конкурс вылö ыстiсны ассьыныс шмоньяссö дас куим автор, а гижöд лыдыс – 80 сайö нин. Гижöдъяс пиын эм и анекдот сяма шмоньяс, и миниатюраяс, и ичöтик пьесаяс. На лыдын зэв аслыссяма, серам петкöдлысь шмоньяс! Окота эськö, мед пьеса сяма гижöдыс лои унджык, öд татшöмсö и пуктыны, и видзöдны кокниджык.
Июнь 3 – 22 лунъясö театр нуöдас челядьлы творческöй площадка «Театральнöй каникул». Челядь тöдмасясны артисталан сямöн, сöвмöдасны актёрскöй кужанлунъяс, велöдчасны сьывны, йöктыны, ворсасны мойдъясын. Площадка нуöдасны театрса артистъяс, хореограф да хормейстер. Май 30-öд лунöдз виччысьöны заявкаяс.

Фестиваль, конкурс да площадка серти позьö гижны театрлöн электроннöй кудйö – komifolk@yandex.ru.

А нöшта – том йöзлöн, школа помалысьяслöн колис неуна кад, мед определитчыны водзö олöмöн. А миян театр буретш корсьö енбиа коми ныв-зонмöс! 

Пуксьы да ваксьы!

Миян театр йöзöдлiс юöр "ТЕШ ТЫШ" конкурс йылысь. Вöлi мöвпыштöма, мый помшуöмсö юöртам «Пуксьы да ваксьы!» шмонитан рыт дырйи март 31 лунö. Но шмонитана гижöдъясыс воöны вöлi медбöръя лунöдз, да и, веськыда кö шуны, миянлы ёна кажитчис гижысь-шмонитысьяслöн зiльöмыс, и ми шуим кывкöртöдсö концерт дырйи не вöчны, а нуöдны конкурссö водзö!

Неуна кö концерт йылысь, "Пуксьы да ваксьы" концерт дырйи залын эз вöв ни öти прöст места, яблöглы некытчö вöлi усьны, рытыс, позьö шуны, артмис! Тайö серамбана концертыс кöть и тöдса «Коми шмоньлöн» водзö нуöдысь, шуам – пи, но торъялiс сiйö сыöн, мый медводдзаысь артист-юмористöн асьнысö кылiсны миян театрса томулов. Тешкодь висьтъясöн сцена вылö петiсны Илья Карманов, Роман Поличенко, ичöт пьесаторъясын ворсiсны Валериан Канев да Ангелина Шахова. А Данил Чудовлöн монологысь залтырыс кочкавтöдз сералiс. Мый шуанныд? Энö волöй да он тöдöй, мый вöлi сэнi сэтшöмыс? Да сатира öнiя олöм вылас – сiйö öд сы вöсна и серам, мый мукöддырйи бöрдны окота… 

Илья Карманов. "Дачаын".

Данил Чудов. "Культура - во!".

В. Канев да А. Шахова. "Сьöлöм косьтысь".

Нималана артистъяс тшöтш дзирдалiсны тайö рытнас. Мукöд роляс найö петкöдчисны медводдзаысь. Шуам, Г. Юшков серти (а сылöн уна миниатюра талун вöлi петкöдлöма) «Кодi шуис?» - карся зятьсö ворсiс Андрей Епанешников.

«Вöтлы, вöтлы» миниатюраын Александр Ветошкин ворсiс Володя Распоповöс.

«Мендельсон» Нина Обрезковалöн тешторйын ворсiс Андрей Засухин.

«Мый тэн колö?» номерын Шахнас вöлi Александр Канев.

А. Ветошкин да Г. Подорова. "Вöтлы, вöтлы".

"Мый тэн колö?"

А. Засухин да Е. Чувьюрова. "Мендельсон"

«Теш тыш» конкурсö ыстöмаясысь öнi вöлi пуктöма сцена вылö сöмын öти гижöд - Висер сиктса Екатерина Михайловалöн "Сизим невеста" ичöт пьеса. Кыдз тыдовтчис, пуктöмыс кажитчис видзöдысьяслы, сералiсны уналаын, кöть, шуам, висьталанторйыс и курыд помкаа – война бöрын сиктö бöр воис сöмын öти мужичöй… Но öд том да ворсысь вир-яя аньяслы кöть кутшöм кадö муслуныд колö! Со и чукöртчисны сизим öтка нывбаба, мед юкны öтка мужикуловсö – Микулаюшкосö.

"Сизим невеста"

Öнiя кад кежлö миянлы ыстiсны ассьыныс шмоньяссö дас автор. Гижöдъяс пиын эм и анекдот сяма шмоньяс, и миниатюраяс, и ичöтик пьесаяс. На лыдын эмöсь зэв аслыссяма, серам петкöдлысь шмоньяс! Окота эськö, мед пьеса сяма гижöдыс лои унджык, öд татшöмсö и пуктыны, и видзöдны кокниджык. Ми шуим нюжöдны серамбана гижöдъяс конкурссö ЛОКТАН АРÖДЗ, мед чукöрмас нöшта на унджык теш, а сэсся тайö гижöдъясысь театр вöчас тырвыйö дзонь концерт! И не сöмын концерт, эмöсь нöшта на интереснöй мöвпъяс....  Но та йылысь бöрынджык, а öнi ми виччысям тiянсянь, дона коми йöз, серам петкöлысь гижöдъяснытö!

"Теш тыш" коми шмонь конкурс

"Макар Васька" спектакль - интернет пыр

Пыдди пуктана театр радейтысьяс, унаöн тiян пиысь корöны спектакльяслысь видео, мед позис видзöдны Сыктывкарсянь ылын олысьяслы. 

Со, миян неважöн лои позяна видзöдны нималана "Макар Васька - сиктса зон" спектакль интернет пыр. Тайö видеосö гижöма диск вылö лэдзöм понда, дисксö тшöтш позьö ньöбны, но а кодi олö ылын да оз вермы воны театрö видзöдны спектакльяс либö ньöбны диск, налы и сетсьö татшöм позянлун. Мынтысьöм бöрын видео позьö видзöдны вежон чöж. Доныс сэтшöм жö, ньöбны кö видеодисксö - 250 шайт.

https://komiteatr.ru/1/?p=4923 - миян сайт вылö ыстöд, кытысянь позьö видзöдны "Макар Васькасö".

Медшöр рольясын:

МАКАР ВАСЬКА –  КР-са нар. артист, КР-са Госпремияа лауреат Александр ВЕТОШКИН

ГАЛЯ –  КР-са нар. артистка, КР-са Госпремияа лауреат Алёна СМЕТАНИНА

ЛИЗА –  КР-са засл. артистка, КР-са Госпремияа лауреат Елена ЧУВЬЮРОВА

ВЕРА –  КР-са нар. артистка, КР-са Госпремияа лауреат Валентина СОКОЛОВА

ÖЛЬÖКСАН – КР-са Госпремияа лауреат Андрей ЗАСУХИН

МИШКА – артист Александр КАНЕВ         

ДАРЬЯ, Васькалöн мам – КР-са Госпремияа лауреат Альбина КАРМАНОВА

ВАРУК, Галялöн мам – КР-са нар. артистка Галина ПОДОРОВА

ПЕДÖР –  артист Сергей ТУРКИН

СЕМÖ –  КР-са засл. артист, КР-са Госпремияа лауреат Андрей ЕПАНЕШНИКОВ 

ИВАН АНДРЕЕВИЧ, колхозса председатель – КР-са Госпремияа лауреат Владимир УЛЯШЕВ

ТОМ ЙÖЗ –   КР-са засл. артист, КР-са Госпремияа лауреат Андрей ЕПАНЕШНИКОВ, КР-са засл. артистка Зоя ОСИПОВА,  КР-са Госпремияа лауреат Альбина КАРМАНОВА, КР-са Госпремияа лауреат Анна ПОПОВА, артистка Анна БОБРЕЦОВА

Вöльдiнса том артист

Тöдмасьöй, кодi абу на тöдса – Илья Карманов. Тайö Кулöмдiнса визув зонкаыс зэв на том, а уджалö-артисталö нин карса театрын. Колян во сiйö помалiс Сыктывкарса В.Т. Чисталёв нима культура колледж, велöдчигас на заводитiс ворсны Коми Республикаса вужвойтырлöн шылада-драмаа театрын. А öнi на сöмын Илья локтiс армияысь да бöр пырöдчö уджö, öд сiйöс виччысьöны сылöн рольясыс.

Зон ворсö шмонитана роль «Льӧм пу дорын аддзысьлӧмъяс» тешын – порсь видзысь Карпöс, кодi радейтö кукань видзысь Соловейöс (Шура Соловьёваöс), томиникöсь да асныраöсь, найö некыдз оз вермыны лöсявны – нывка пыр зонмöс дэльöдö, а зон ставсö примитö зэв матö сьöлöмас.  «Кабаре «Сыктывса кань» мича спектакльын, кöнi авторыс Сергей Журавлёв петкöдлö, кыдзи 1812 во бöрын Усть-Сысольскын овлiсны французъяс, Илья ворсö коми зонмöс, сьылысь-йöктысьöс. «Йöкты, муслун» (Лопе де Вегалöн «Учитель танцев») комедияын И. Карманов – испанияса йöктысь.

Öнiя кад кежлö медыджыд рольяс Ильялы вичмисны Владимир Тимин серти пуктöм кык спектакльын: «Эжва Перымса зонка» да «Ыджыд Перым да Мӧскуа» этно-мюзиклъясын. Медводдза юкöнас, кодi шусьö кыдз и повесьтыс, Илья ворсö Ирьянкоöс – шöр геройлысь ёртсö. «Ыджыд Перым да Мöскуа» юкöнас том артист ворсö Чердiнса мужичöй Бисярöс да Мöскуаса пирöг вузалысь Провöс.

«Эжва Перымса зонкаын» действиеыс мунö Емдiнын 15 нэмын. Тикö (ворсöны Александр Канев либö Валериан Канев) да Ирьянко (Илья Карманов) мунöны ылi вöр керка дорö кыйны чери, а збыльвылас кö, налы окота тöдмавны, мыйсяма гöгöрвотöмтор керсьö сiйö вöръясас. И збыль, найö тöдмалöны, мый вöрöгъяс-йöграяс гусьöн локтöны, мед уськöдчыны Емдiн вылö. Йöграяс öдва оз вины том йöзöс асьнысö, а öд накöд мöдöдчис и Тикöлöн ичöтджык чойыс Кыйва (ворсö Анна Попова)... Тайö спектакляс том йöз пырыс да и став емдiнса олысьяс пырыс петкöдчö миян вöр-ва дiнö пыдi муслун, топыда сыкöд йитчöм, сылысь законъяссö тöдöм. 15 нэмын вöр-ваыс збыль вöлi коми йöзлы оланiнöн, и кöть эськö Перымса Степан неважöн на комиясöс пыртiс Кристос эскöмö, выль эскöмыс эз торкав вöр-ва вынъясö эскöмсö.

Колö шуны, мый тавося ноябрö «Эжва Перымса зонка» повесть серти мюзикл-дилогияыс лоис лауреатöн «Лучшие товары и услуги Республики Коми» конкурсын. И зэв регыд тайö мича спектакльсö театр вайö Кулöмдiнö – «Эжва Перымса зонка» позяс аддзыны декабрь 19 лунö районса культура керка сцена вылын.

Театрö волiсны гöстьяс

Ноябрь 21 лунö миян театрын вöлi уна гöсьт.

Öти-кö, Светлана Гениевна дорö волiсны комиöн гижны заводитысьяс. Коми гижысьяслы семинар нуöдiс Гижысь котыр, и öти лун вöлi сиöма драматургиялы. Артмис сiдз, мый тайö лунö театрö чукöртчисны унджыкыс мужичöйулов. Сёрниыс мунiс драматургия гижан теория йылысь, гижöдъясысь примеръяс босьтöмöн. Прöстджыка кö – кыдзи колö и кыдзи оз ков гижны пьеса. Медшöр мöвпъяссö вайöдам и танi.

Драматурглöн медшöр материалыс – конфликт. Режиссёр сэсся сы вылын подуласьöмöм петкöдлö венласьöм, а артист тайö венласян действиесö вöчö. Гижны заводитiгöн колö юавны ассьыд – мый тэнö вöрзьöдö олöмас? Мый оз кажитчы? И петкöдлыны сiйöс сiдз, мед видзöдысь лоис тэкöд сöглас либö эз, но мед сiйöс тшöтш вöрзьöдiс. Тшöкыда лыддям, кыдз пьесаясын гижöны сёрнисö кыдз медшöртор, а колö, мед медшöрнас вöлi лоöмтор. Öд конфликтыс петкöдчö действие пырыс.

Драматургия - тайö олöмыслöн квинтэссенция, автор петкöдлö дженьыд кадöн унатор. Овлö, мый гижöны сiдз, кыдз эм – кузь сёрниясöн, ньöжмыда, но видзöдысьлы места вылын жöдзöмыс öдйö дышöдас. Сылы окота тöдны, а мый водзö? Мый лоис та бöрын? Олöмным öнi миян зэв жö öда, тэрыб. И колö сюжетыслы öдйö бергöдчыны, вежсьыны. А сюжетыс, кыдзи и геройясыс, пыр уджалö медшöр конфликт вылö. Быд лоöмторйын, вöчöмторйын эм помка да сыысь артмöмтор. И найö чеп моз кыöны сюжетсö. Тайö «причина-следствие» йитöд.

Театрö волысь сы вылö и шусьö «видзöдысь», мед аддзыны лоöмторсö сцена вылысь. Не кывны медводз, не мöвпавны дыр, мый жö кöсйис шуны авторыс, а аддзыны. Уна тема вылö оз позь шыбласьны, колö нуöдны медшöр визь, а мöдног видзöдысь оз и кут гöгöрвоны, мый йылысь сiйöс корö мöвпыштны авторыс.

Медводдза серпассянь видзöдысь должен аддзыны кутшöмкö лоöмтор, мыйсянь ставыс заводитчö. Геройлöн эм кöть кутшöмкö, но кризис, мыйкö вежис сылысь олöмсö. Пьеса чöжöн оз позь вежны геройлысь сямсö, сiйöс кö оз веж кутшöмкö вына лоöмтор. Вежсьö кö видзöдласыс - сiдзкö, та йылысь и пьесаыс.

Гижöм водзын драматург должен гöгöрвоны, кутшöм конфликт сiйö петкöдлас: герой – герой, герой – среда, герой – видзöдысь. Бытовöй тайö конфликтыс али социальнöй.

Но медбура пьесаыс артмас сэки, кор авторсö темаыс збыльысь майшöдлö.

Мöд-кö, тайö жö лунö театрö волiс Францияса коми культура туялысь Себастьян Каньоли. Став артистъяс, мукöд уджалысьяс радпырысь кывзiсны гöсьтöс. Комиöн, дерт. Сёрнитiм выль петöм небöг йылысь, кодöс Себастьян и воис презентуйтны Комиö. Небöгыс шусьö, коми ног кö, «Коми му весьтысь занавес кыпöдöм. Россия Войвывса фин-угор театр став миркöд сёрниын». Танi сiйö унатор гижöма и миян театр йылысь, некымын пьеса йылысь, кодöс аддзылöма да лыддьылöма, Ниццаса театркöд миян ёртасьöм йылысь. Себастьян, кодi оз тöд, ачыс вуджöдö коми пьесаяс француз кыв вылö, и сы отсöгöн коми пьесаяс ворсöны Францияын.

Виктор Савинлöн Югыд кодзув

Ноябрь 9 – 10 лунъясö Коми Республикаса вужвойтырлöн шылада-драмаа театрын шыалiс премьера. «Югыд кодзув» нима спектакль сиöма Нёбдiнса Витторлöн чужöмсянь 130 во тырöмлы. Тайö пьесасö лöсьöдлiсны Светлана Горчакова да Виктор Кушманов нималана драматург, гижысь, поэт, журналистлöн биография да гижöдъяс серти 30 во сайын на, и сэки сiйö мунлiс драма театрса сцена вылын. Öткымын видзöдысь пасйис, мый кöть найö и аддзылiсны и помнитöны тайö пуктассö, öнiя постановкаыс - дзик выль. Мукöд образыс петкöдлöма дзик мöд ног (шуам, Саваоп да Апостол), торъя ошкöм вичмис оформлениелы да сьыланкывъяслы.

Колö шуны, видзöдысьяс сибöдiсны сценавыв петкöдчöмсö матö сьöлöмас - кодсюрö и бöрдыштiс, да и сералiсны мукöдлаас кыпыда. Чайта, некод эз мун спектаклысь тыртöм мöвпöн, быдöн мыйкö аслыс босьтic. Унаöн вуджöдiсны пöшти сё во сайсясö öнiя кад вылö, и таысь нюкыртлö сьöлöмтö... 

Спектакляс сюрис места и тешлы, и шоглы, видзöдысьлы петкöдчис Виктор Савинлöн Райыс – сылöн творчествоыс, да Адыс – буретш тайö творчество вöснаыс сiйöс мыжтöг мыждöм. Öти сцена вылö петiсны и ачыс Нёбдiнса Витторыс (ворсö Александр Ветошкин), и, дерт, сылöн геройясыс, на пиын и Сюзь Матвей (ворсö Сергей Туркин).

Спектакль дорö шыладсö гижис Коми Республикаса народнöй артист Александр Ветошкин.

Виктор Савин – морт, кодлöн нимыс топыда йитчöма коми культуракöд. Веськыда кö, сiйö ачыс и лöсьöдiс-сöвмöдiс коми культуранымöс, и сетiс олöмсö вужвойтырлöн искусство понда – веськалiс НКВД-са изкиö кыдз националист. Уна эськö сiйö вермис на гижны, эз кö сiйöс ви сэкся чорыд кадыс. В. Савин гижис 30 сайö пьеса, но унджыксö на пиысь ми эгö аддзылöй да огö нин вермöй лыддьыны – ниöти лист эз коль, кöть эськö сы кадö тайö гижöдъяссö чайтлiсны коми литература шедеврöн.

Уна гижöд сылöн сиöма Октябрьса революциялы. Но шöр визьыс век жö вöлi Коми му, кыв да йöз дорö муслун. Савинлöн гижöмыс петкöдлö буретш коми сёрниног, оласног, фольклор – сiйö зiлис, мед гижöдъясас тöдчис национальнöй сям.

А уджалiс творчествоас сiйö шензьöдана зiля – гижис пьесаяс, вöчис инсценировкаяс, ачыс пуктiс народнöй театрын пьесаяссö, ворсiс рольяс, а нöшта и уджалiс – ЧК-ын, газет редакцияын...

«Югыд кодзув» - тайö абу сöмын тöдса сьыланкывйыс, кодöс гижис В. Савин. Тайö сылöн енбилöн кодзув, кодысь ми, водзö олысь комияс, дыр на сiйöс  кутам аттьöавны.

Кодi эз удит видзöдлыны премьерасö, корам спектакль вылö ноябрь 21 лунö 16:00 (!) часын.

Коми мойда шойччан лун

 Кодi, огö кö ми асьным - бать-мамъяс, пöль-пöчьяс - видзöй-сöвмöдöй ассьыным коми кывнымöс. Мед кывным олiс, колö, мед челядь тöдiсны, сёрнитiсны, лыддьысисны комиöн.

А ми öд асьным вöчам, кыдз кокниджык: челядь рочасьöны – и накöд рочасям ми, бать-мам. А öд видзöдлан во дас мысти – и некодлы нин лоас лыддьыны Геннадий Юшковлысь сöстöм коми кывъя романъяс, Серафим Поповлысь муслун чужтысь лирика… Роч вылö вуджöдöмыд, кыдз эськö эз вöв мичаа вöчöма-шыльöдöма – оз öд петкöдлы коми кывлысь серпасалунсö, татшöм образъяса, вуджöдтöм сёрнилысь мичлунсö сöмын чужан кыв вылад и гöгöрвоан.

Коми кыв видзöм йылысь мöвпалö и коми театр. Коми кывъя видзöдысьлы колö коми театрыс. Мед кывзыны чужан кыв вылын ворсöм-сьылöм да шойччыны лолöн. А коми театрлы колö коми видзöдысь, сытöг öд и став коланлуныс кусас.

Ми, коми йöз да комиöн ворсысьяс-сьылысьяс, зэв ёна кöсъям кывны ловъя коми сёрни, мед век вöлi кодкöд сёрнитны комиöн, мед олiс коми кывйыс сцена вылын, мед быдмисны-сöвмисны коми гижысьяс, драматургъяс, мед лоисны выль коми гижöдъяс, пьесаяс, сьыланкывъяс. И зiлям та понда унатор вöчны. Петкöдлам спектакльяс коми кыв вылын, нимöдам коми гижысьясöс, сьылам комиöн, ворсам комиöн, сёрнитам комиöн, и зэв ёна надейтчам, мый бурмöдам сьöлöм коми кыв радейтысьяслы.

Вужвойтырлöн шылада-драмаа театр öнi петкöдлö шойччан лунъясö челядьлы мойдъяс, кытчö позьö волыны став семьяöн. Миянлы окота, мед буретш öтлаöн, котырöн, коми йöз видзöдiсны-кывзiсны чужан кывъя спектакльяс, мича яръюгыд мойдъяс. Челядьлы, кодi озджык гöгöрво комисö, вермас отсавны вуджöдчан аппаратура. Мукöд посниыс сы вöсна и радейтö ветлыны коми театрас. А кодi неуна сёрнитыштö-гöгöрвоö, налы вермасны отсавны-вуджöдчыны и бать-мамыс. И став семьялы гаж да öтув шойччöм, и коми кывным водзö вылö оз вун. Вайöдлöй челядьнытö коми спектакльяс вылö!

Октябрь 28-öд лун (вöскресенньö) 11:00

– «Нагай лэбач» мойд, Н. Щукин, 0+

Ноябрь 25-öд лун (вöскресенньö) 11:00

– «Ёма да Чача» мойд, А. Епанешников, 0+